NA ESTREA DO DOCUMENTAL

Na procura do noso pasado romano

O día 20 de xuño, ás 20:00 h. estreouse o documental Na procura do noso pasado romano, realizado polo alumnado de Cultura audiovisual e escénica do noso IES e o alumnado de Latín II do IES Lauro Olmo do Barco, ambas materias de 2º de bacharelato.
O documental é o resultado dun proxecto educativo levado a cabo durante todo o presente curso escolar. Consta de dúas partes diferenciadas, a primeira ten como obxecto estudar e poñer en valor algúns dos restos romanos atopados na nosa comarca, e a segunda consiste nunha pequena homenaxe a un grupo de arqueólogos afeccionados, chamados Os Escarvadores, que atoparon unha boa parte deses restos romanos nos anos 70 e que desenvolveron unha importante labor, na actualidade descoñecida ou inxustamente esquecida, de cara á súa catalogación e difusión.
O documental recolle datos de distintas fontes de información, visita a restos romanos da zona con explicacións in situ a cargo de especialistas, entrevistas a persoas de diferentes ámbitos relacionadas co tema, charlas dirixidas ao alumnado a cargo de expertos en romanización e moitas horas de cotexamento de datos, elaboración de guións, montaxe, edición, posprodución, promoción e todos aqueles aspectos precisos para a culminación do traballo.
O traballo foi coordinado polos profesores de latín dos dous institutos, Carmen Díaz Rifón do Cosme López e Julio Parada Yáñez do Lauro Olmo, e por José Ramón Crespo Cerezuela, profesor de Bioloxía do Cosme López, quen dirixiu e supervisou os aspectos técnicos do documental.
A estrea foi un éxito rotundo. A afluencia de público foi moi superior á prevista e os asistentes amosaron gran interese por coñecer de novo, nalgúns casos, ou lembrar noutros, a importancia do pasado romano da comarca de Valdeorras.
Ver o pase fotográfico
Clica na foto ou aquí mesmo para ver o trailer.

[ pechar ]